Madagascar-Tribune.com

Izay mahavory vahoaka, dia afaka manonga-panjakana

Naivo kely — 2009-01-26T03:55:06Z

Mazava ny resaka. Te-ho filoham-panjakana i Andry Rajoelina. Vonona ny hiroso amin'ny rafitra teteza-mita ny tenany, ka izy ben'ny tanàna no hitarika izany. Tsy mila mpanao politika ho ao ambadikany izy. Isan'ny teny heno teny amin'ny kianjan'Ambohijatovo izany ny sabotsy lasa teo.
Vahoaka maro be no tonga nanohana ny antson'ny ben'ny tanàna, i Andry Rajoelina. Niainga ny hafanam-po ka ny fitaomana ny vahoaka hidina teny amin'ny Kianjan'ny 13 mey no niafaran'ny resaka.

Kianja manan-tantara

Izay tolona rehetra natao, dia niainga teny amin'ny Kianjan'ny 13 mey. Io no nambaran'i Andry TGV, ben'ny tanàna eto an-dRenivohitra. Nitoman-davana ny olona nihazo iny faritra iny. Tsy nisy ny sakana nataon'ny mpitandro ny filaminana. Nikabary tsy amin-tahotra ny ben'ny tanàna, satria hery inona tokoa no sahy hifanandrina amin'ireto olona maro be ireto. Akatona ny toeram-piasana rehetra manomboka anio, ary tsy misy mianatra ny mpianatra. Etsy Analakely avokoa no fotoana anio manomboka amin'ny folo. Tsy afa-po tamin'ilay “Kianjan'ny demokrasia” ny ben'ny tanàna, ka ny fidinana etsy amin'ilay Kianja manan-tantara no nanohizana ny hetsika rehetra.

Ravao ny Governemanta

Antso nataon'ity mpitarika ny fanoherana ity eto an-dRenivohitra ny handravana ny governemanta. “Tsy hitsahatra ny fitakiana etsy amin'ny Kianjan'ny 13 mey raha tsy tontosa ny tanjona iriana rehetra. Hikatso manomboka anio ny “machine administrative rehetra” . “Tsy asiana olana na dia hisy ho rava aza aloha ireo asa izay efa napetraka eo amin'io kianja io, fa arenina rehefa vita ny tolona” .

Ireo asa tsy maintsy atao

“Ho sokafana avy hatrany ny FPVM afahan'ny vahoaka mivavaka manerana an'i Madagasikara. Hiditra amin'ny fanafarana menaka Ar 2000 ny litatra, ary amidy avy hatrany ny fiaramanidina Force One raha vao mandray ny fahefana ao anaty tetezamita ingahy ben'ny tanàna” . Tsy vitsy ny niantso azy sahady ho “prezida” teny amin'ny kianja 13 ny sabotsy lasa teo.

Tezitra ny mpanao politika

Manoloana ny filazana omaly fa “tsy misy mpanao politika miaraka amin'ingahy ben'ny tanàna” , dia somary nampiaka-peo ihany izy ireo. Nahoana raha vao nanomboka ny hetsika rehetra no nilaza izany ingahy ben'ny tanàna ? Sa efa hita fa mitady ho faty ve ny voay, dia ahilika amin'izay izahay. Ho hita eo ny tohiny, fa misy hisainana ireny rehetra ireny. Mpanao politika sy mpitarika vahoaka miisa 17 no nanambara ireo, raha niresaka fohy tamin'ny mpanao gazety io andro sabotsy io. Tsy toerana no tadiavin'ny mpanao politika fa ny fametrahana ny ara-dalàna sy ny tena demokrasia eto amin'ny firenena.

Dia ho sanatria ve hametraka ny mpanao politika ho an'ny amin'ny toerana tsy misy ilàna azy ity ben'ny tanàna ity, vao mianatra mamindra eo amin'ny tontolo politika, hoy kosa izay tsy faly tamin'iny resaka iny.
Sa maro loatra ny feo mandeha fa mpanao politika goaika antitra no ao ambadiky izao tolona izao, ka aleo manadio tena sahady ? Ho hita eo aloha, fa ny tsapa dia ho tohatra fiakarana ihany ny ankamaroan'izy ireo.

Inona no hitranga manomboka anio ?

Izay olona mahavory vahoaka, dia afaka manonga-panjakana. Ary sahy milaza fa izy no tena dadany. Mbola misy ilaina ny fifidianana ve eto amintsika raha izao no mitohy ? Mety ho voabaikon'io herim-bahoaka io avokoa ny lalàna velona rehetra, ary na ny fitsarana aza tsy ahafehy izany. Rehefa ny herim-bahoaka no miteny, fa avohay ireo gadra, dia mivoaka, satria izay ilay fitsaram-bahoaka ? Ny governemanta avy ity no baikon'ny herim-bahoaka hiala, ka handrosoana tetezamita noho ny fanakatonana fahitalavitra iray. Tsy hisy firenena hankato ny fandrom-baham-pahefana an-dalambe, ka ho azo antoka, fa hiantraika eto amintsika ny ankivy maneran-tany. Ho foana ihany koa ny fandraisana ilay fivoriana an-tampony atao eto amintsika mandritra ny taona roa mifanesy. Izay ve no tena fampandrosoana ? Dia ho hita eo anio, fa ny fanjakana aloha tamin'iny sabotsy iny, dia efa nilaza ny ministra Rakotonirina Gervais fa manohy ny asany ny governemanta, ary niantso ny vahoaka ho tony.

Mba mahalalà menatra

Naivo kely — 2009-01-26T03:54:59Z

“Nampanongo tena ny rehetra ny nahita an'ingahy Florentin, nikabary teny Ambohijatovo ny sabotsy teo. “Ny fanekena ny 10% fanondrotana nomen'ny fanjakana isan-taona, dia tsy ekena. Ny fitakiana ny hijerena ny mari-karama no tokony ho jerena maika, ary manomboka izao, dia akatso ny asam-panjakana rehetra” .

Dia gaga ny maro raha nahita ireto nikabary teny Ambohijato. Iza no tsy nahalala an'ingahy Ramamonjisoa Florentin, fony vao niakatra ny fanjakana Ravalomanana, fa SG tao amin'ny minisiteran'ny Asam-panjakana ny lehilahy. Ady toerana tamin'ingahy Vola Dieu Donné no niseho tao, ary niafara tamin'ny fifandroahana. Tsy nisy tanteraka ireo kabary tsara lahatra nataon'ny tamin'ny 2002 ho fanatsarana ny fiainan'ny mpiasam-panjakana. Sa hilaza indray izy, fa nitaky ny hanatsarana ny mpiasam-panjakana no antony nanalana azy tao amin'io minisitera io. Olona hafa asaina mikabary amin'ny manaraka, fa tsy ireo efa hita fa tsy nahavoa fony nahazo toerana e !” Razily tsy very tadidy !

Toko tapaka

Naivo kely — 2009-01-26T03:48:39Z

Toko tapaka

Écouter cet article

Mitsingilaila ny fitondra foibe ankehitriny. Io dia noho ny hetsi-bahoaka izay miseho eto an-dRenivohitra, mba tsy hilazana fa mety hanerana an'i Madagasikara. Vokatry ny tsy fisian'ny fifampihainoana no anton'io, satria efa ela no nitaky fa misy tsindry hazo lena mitranga eto amin'ny firenena.

Nipoaka iny ny sarom-bilany. Ny tohiny no tsy hay na hiparitaka hatramin'ny aty vilany, na tsia, fa ny azo antoka, tsy ho faty intsony ny afo efa niotrika tao am-pon'ireo mahatsiaro fangirifiriana teto amintsika hatramin'izay. Tsy ho eto an-tanindrazana ihany no hanako ity tranga ity, fa hanerana an'izao tontolo izao. Nahoana tokoa moa no tsy hifantoka eto ny mason'ny mpanara-baovao rehetra, satria firenena handray ny fivoriana an-tampony aty Afrika isika, ny volana Jolay ho avy izao. Eo ihany koa ny fivorian'ny tany mampiasa ampahany na manontolo ny fiteny Frantsay.

Kely finoana anefa ny maro ny mety hanaovana ireo aty, noho izao hetsi-bahoaka eto an-dRenivohitra izao. Tsy hisy firenena andeha hanao sorona ny ainy any amin'ny tany misy hotakotaka. Ekena fa mety ho fandaminana ny sehatra toy izao no ahatongavan'ireny vahiny ireny, saingy isika firenena tsy misy manafika, fa firenena miady an-trano. Tsy vao izao no misy ady an-trano tahaka izao, fa saika ao anatin'ny valo na folo taona hatrany. Iza no andeha handany ron-doha lava amin'izany ? Tsy mety fay isika, fa toa voahozona ny hiady an-trano lava izao. Izay anie no ilaina ny fahaiza-mihaino sy mifanakalo hevitra e. Toko tapaka ny an'ny fanjakana sy ny ben'ny tanàna ary ireo mpanara-dia azy avy, ka ahiana ny hisian'ny fifandonana toy ny tamin'ny taona 2002. Dia hifandrafy lava eto, ary hifanagadra avy. Tsarovy fa raha mivadika eo ny glaoby eto Madagasikara, dia hisy valifaty mahatsiravina eto. Dia ho sanatria ve hisy hitsoam-ponenana toy izao mahazo an-dRatsiraka sy ny firongony izao eto ?

Sora-baventy hanala ny filoha maro no efa vonona

Naivo kely — 2009-01-24T03:09:43Z

"Mitondrà sora-baventy, sy rano ary lamba miloko volom-boasary” . Io no antso avo nataon'i ben'ny tanàna, Andry Rajoelina, ny alakamisy lasa teo. Efa fantatra ny mety hitranga saingy tsy hihemotra amin'izany isika” .

Heno ary fa misy fikambanana iray, izay mikarakara manokana ny fanamboarana ny sorabaventy amin'ity anio ity. Fitakiana ny hialan'ny filoha Ravalomanana no betsaka amin'io sorabaventy io. Ny resaka fitakian'ny mpiasam-panjakana ihany koa, dia ho maro ao amin'ireto soratra ho lanjaina anio ireto. Ho zaraina amin'ireo karazan'olona maro samy hafa izy io, ary voalaza fa mahatratra dimy alina ariary( Ar 50 000) ny vidin'ny iray tamin'ny nanamboarana izany.

Ho tapaka ny làlana

Nampitomboina ihany koa ny olon-tsotra hitandro ny filaminana, sao misy ny herisetra mety hitranga. Misy rano ho entina amin'ny tavoahangy maro ihany koa anio, satria hiarovana amin'ny mety hisian'ny fandefasana baomba mandatsa-dranomaso. Ny lamba miloko vonim-boasary ihany koa dia ho zaraina amin'izay olona ho avy etsy Ambohijatovo.

Voalaza fa anio amin'ny sivy ora maraina, dia hisy hafatra ampitain'ingahy ben'ny tanàna amin'ny vahoaka ho avy eny Ambohijatovo. Ankoatry io, dia ho tapaka ihany koa ny làlana eny an-toerana, ary mbola ny vaovao heno ihany, dia mety hisy ny filaharana hidina an-dalambe, raha toa hono ka mitaky io ny vahoaka anio ? Ho hita eo ny tohiny, fa mailo ny ankamaroan'ny mpivarotra manodidina toy ny etsy Analakely sy Behoririka ka hikatona mialoha anio, sao mety hisy andian'olona hanararaotra amin'ny fandrobana.

Hanorana sa hanavandra ?

Naivo kely — 2009-01-24T02:59:50Z

Lasa lavitra ny hetsiky ny ben'ny tanàna eto an-dRenivohitra sy ireo mpiara-dia aminy. Tsy fitakiana fe fitakiana tsotra intsony fa efa miroso any amin'ny fandrodanana ny fanjakana foibe mihitsy.

Tsapa io amin'ireo fivoriana ataon'izy ireo etsy sy eroa. Tsy misy mihitsy finiavana hiroso amin'ny fiaraha-midinika, fa izao fitakiam-bahoaka izao no hany heno amin'ny resaka avoakan'ny vavany. Ankilan'izay, dia tsy mbola hay izay ho valin-kafatra ho asetrin'ny fanjakana izao. Na ho ela anefa na ho haingana, dia ho ratsy ny fiafaran'izao tantara izao. Maro amintsika no mahafantatra ny tohiny, saingy minia tsy miloaka ny vava izay tohiny izay, sao ahitan-doza. Io hiarahana mahita io ny fifandonana eo amin'ny filoham-pirenena sy ny ben'ny tanàna. Tsy azo adino fa samy manana ny olona mpanara-dia azy avy ireo, ka ny ahiana, dia mety any amin'ireto vahoaka ireto no hifandramatra ny farany.

Heno mantsy fa misy fikambanana vonona hiaro ny safidiny tamin'ny fandaniana ny filoham-pirenena eto. “Nahazo ny isam-bato 53% ny filoha manerana an'i Madagasikara” , hoy izy ireo, ka tsy avela ho viravirain'ny olona te-handrombaka fahefana” . Hanorana sa hanavandra, hoy ny fomba fiteny ny tranga eto amin'ity tanàna ity ? Efa manomboka mifanondro molotra ihany koa ny eny anivon'ny fiaraha-monina. Ny ady an-trano no tena atahorana vokatry ny tsy fitoaviam-pijery politika eto amin'ny tanàna.

Hitarika vahoaka etsy amin'ny kianjan'Ambohijatovo indray ny ben'ny tanàna anio. Hisy ve ny sakana ataon'ny mpitandron'ny filaminana sa avelao ho eo fa rehefa reraka mangina eo ihany ?

Arovanay ny 53% azon-dRavalomanana

Naivo kely — 2009-01-24T02:59:42Z

“Aza atao resabe ny demokrasia, fa tena ampiharo” . Io no nambaran'ny fikambanana vao nijoro vonona hiaro ny filoha Ravalomanana. Ny antony, dia lany tamin'ny isam-bato 53% manerana an'i Madagasikara ny filoha Ravalomanana, ary 63% kosa ny an'i Andry Rajoelina izay teto an-dRenivohitra monja. “Ho atao tsinotsinona ve ny safidin'ireo vahoaka maro be manerana an'i Madagasikara, hoy ity fikambanana vonona hampihatra ny tena demokrasia ity. Ninia nangina izahay tao anatin'izay andro maromaro izay, ary dia nihevitra ny ankilany fa resy ny safidinay narotsaka ho an'ny filoha ankehitriny. Tsia, tsy afaka ny hangina ho volamena intsony izahay” , hoy ry zareo.

Hanao hetsika ihany koa

Fantatra ary izao fa hisy hetsika goavana ihany koa ho ataon'izy ireo hanoherana izao “famotehana ny fiainam-pirenena” izao. Ny alakamisy alina teo no fantatra fa nisian'io fivoriana io, ary heno fa ankolafin'olona manerana ny faritra maro eto amin'ny Nosy no mivondrona ao amin'ity fikambanana vao nijoro ity.

Misy malahelo raha maty ny afo

Naivo kely — 2009-01-23T03:57:03Z

Be izay resaka efa nandeha avy amin'ny filoham-pirenena sy ny ben'ny tanàna eto an-dRenivohitra izay, nefa mbola tsy hita fiafaràna ny mety hisian'ny marimaritra iraisana.

Toa ny vahoaka fotsiny no voky resaka, fa ny fampiharana azy no mbola tsy hita. Nitondra ny fanehoan-keviny momba ireo fitakiana ataon'ny ben'ny tanàna ny filoha Ravalomanana raha nitsidika ny faritra iva sy ny HJRA ny alarobia teo. Nohazavainy amin'ny antsipiriany teny imasom-bahoaka ireny resaka nilam-baliny ireny, toy ny fanalàna ny ireo minisitra roa ao anaty governemanta. Ny fanokafana ny fahitalavitra VIVA sy ny fanesorana ny MBS amin'ny toerana misy azy ankehitriny.

Tsy niandry ela ny ben'ny tanàna Andry Rajoelina, fa namely avy hatrany ireny teny nataon'ny filoha ireny. Tsapa fa tsy misy finiavana hirosoana amin'ny marimaritra iraisana ity farany, fa ny fihaonana amin'ny vahoaka ny sabotsy no hita fa mbola masaka ao an-dohany.

Hita ihany koa fa misy andian'olona maniry mafy ny hirehetan'ny afo eto amin'ity tanàna ity.

Toa fahoriana amin'ireny andian'olona ireny, raha miroso amin'ny fifanatonana ireto ray aman-dreny sy zanaka ireto. Porofo mitohoka amin'ny tenda izany, fa misy olona manosika mafy an'ity ben'ny tanàna ity, hiroso amin'ny hetsika toy ny tamin'ny taona 2002.

Maro ny vahoaka tsy te-hiroso intsony amin'izany fikomiana izany, satria manimba ny fitadiavany isan'andro. Ao kosa anefa ireo mihevitra fa ny fanonganam-panjakana no làlana iray mety hipitihan'ny vitana ho azy ireo, ahafahana mahazo toerana ao anaty fitondrana.

Fiovam-piasa fa tsy fanonganam-panjakana

Miara-miaky ny rehetra, fa tsy azo atao ambanin-javatra ireo fitakiam-bahoaka tetsy Ambohijatovo. Isan'io ny tsy tokony hirobarobana ny volam-bahoaka. Ny fampanjakana demokrasia eto amintsika, ary ny fanajana ny zon'olombelona sy ny fanomezana fitenenana ny ankolafin'olona maro samy hafa ao amin'ny haino aman-jerim-panjakana. Na ny ben'ny tanàna Andry Rajoelina aza tsy sahy namoaka vava ny hanesorana ny filoham-pirenena, na ny fandravana governemanta, fa andiana minisitra roa no nametrahany fepetra ny hanesorana azy. Midika io, fa tsy tonga any amin'ny fanonganam-panjakana ny hevitry ny ben'ny tanàna, saingy ireo andian'olona hafa kosa no maniry sy manosika azy hanao izany. Moka ve ka mora ho vonoina ny mpitondra fanjakana ? 18 tapitrisa ny mponina eto Madagasikara, izay heverina fa samy manana ny fomba fijeriny, fa tsy sanatria kilasiana ho mpikomy avokoa.

Tanteraho fa azo atao !

Naivo kely — 2009-01-23T03:56:56Z

Raikitra ny fidinana ifotony ataon'ny fitondrana eny anivon'ny vahoaka. Fijerena mivantana ny asa tokony ho atao, mba ahafahan'ny rehetra miala ao anatin'ny fahasahiranana. Hifaninanan'ny andrim-panjakana sy ny olom-boatendry sy ny olom-boafidy ny toy izany.

Tsara tokoa ity fomba fiasa vaovao ity, satria raha tsy nidina ifotony ny filoha Ravalomanana, dia tsy nisy mpitsetra ny fanamboarana ny hopitaly etsy Befelatanana sy ny HJRA Ampefiloha. Hanara-penitra ny asa, ary maro ireo fitaovana tsy misy ao amin'ireto hopitaly ireto, na nisy fa efa simba no ho soloina vaovao. Toa nitondra fahasitranana ho an'ireo marary ny fandrenesana izany. Miara-miaky ny rehetra, fa tsy andoavam-bola ny fitsaboana tena amin'itony sehatra itony, saingy vidiana avokoa ny fanafody ampiasaina na ny trano hitoerana, raha hisafidy izany ilay marary. Midika io, fa raha tsy misy vola, dia fahafatesana no hita. Inona no sakana tsy ahafahan'ny fanjakana manome fanafody maimaim-poana ny marary ? Nahoana ihany koa raha averina indray ny fanomezana sakafo maraina, atoandro hariva ireto marary ireto ? Tanteraho fa azo atao izany, raha eo amin'ny mpitondra ny finiavana hanova.

Hiarahantsika mahita fa ny fahasalamana no voalohan-karena. Koa raha niroso amin'ny fanatsarana ny atiny sy ny ivelan'ny hopitaly ihany isika, aleo mba hitovy lenta amin'ny any ivelany ny eto an-toerana e ! Ho azo antoka fa hanana hery goavana ny vahoaka amin'ny asa izay ho ataony amin'ny fampandrosoana ny tanindrazana, ka raha sanatria marary, dia ho azo antoka fa ho tsara karakara. Izany no tena fiovana, satria vitan'ny tany aloha io, koa nahoana no tsy ho vita ankehitriny ?

Milaza ny heviny ireo mponina

Naivo kely — 2009-01-23T03:56:47Z

“Avelao ho an'ny mpanao politika ny tolona izay tiany atao, fa avelao izahay hitady sakafo” . Teny hentitra nataon'i Rampanoelina, mipetraka etsy 67ha Atsimo io. “Tsy rototra amin'izay tranga miseho izahay, satria tsy hisy hanome sakafo anay ireo raha tonga eo amin'ny tanjona iriany. Ny hatsembohanay hatrany no nisian'ny sakafo ao anaty vilaninay, fa tsy misy mana avy any an-danitra” .

“Tsy hampiova ny fiainanay dimy mianaka ny fitarihana olona hirotaka etsy Ambohijatovo” . Io no nambaran-dRasoarinoro Hanta, mpivarotra zava-pisotro etsy Andohatapenaka, akaikin'i trano fiasan'i Me Avoko. “Ny fanadiovana ny faritra misy anay aza tsy misy mpijery rehefa tonga teo amin'ny fitondrany ireo mpitondra nifanesy” .

“Aleo hitolona ny olona, fa io no làlan'ny fiovana. Tsy matahotra ny fiovana izahay” , hoy i Zoliarimanana, mpivarotra hani-masaka etsy 67ha akaiky ny Paositra. “Leo ny fanamparam-pahefana izahay, ka rariny raha tonga maro toy ireny tamin'ny sabotsy ireny ny vahoaka” .

“Mankaleo ny korontana, satria hisy fiantraikany amin'ny asa ataonay eto Namehana izany fitarihana vahoaka hanao hetsika andalam-be izany” . Ra-Hery mpanamboatra fiara etsy Anosibe no nanambara io. “Mba ataovy anatra ny tranga miseho any ivelany, izay potika ny androatokon'ny toe-karena ao aminy. Aleo hanaja raiamandreny ity zandry kely ity, fa sao hanenenana” .

“Maha-menatra ahy ny ataon'ilay milaza ho mpanao gazety vehivavy ao amin'ny radio Viva. Hita mihitsy fa mpitolona fa tsy mpanao gazety izy io, ka tsy ho gaga raha noroahin'ny tompon'ny haino aman-jery niasany teo aloha. Mba mahaiza manaja olona ianao ramatoa kely, fa raiamandrenin'ny firenena ny filoha Ravalomanana” . Io no teny henjana nataon'i Fanohery ao Ambodin'Isotry, mpivaro-kena, akaikin'ny tetezan'i Bekiraro.

Ireo ny hevitry ny olona voaray teto amin'ity gazety ity, izay ninianay nofintinina ihany.

« Hanjakan'ny be marenina ny tanàna »

Naivo kely — 2009-01-22T03:22:38Z

“Minia manampi-tsofina ny fanjakana foibe manoloana ny sakantsakana ataony amin'ny kaominina eto Antananarivo-Renivohitra, ka eo no mahatonga ny fihetseham-bahoaka ankehitriny. Azo atao tsara anefa ny misoroka izany, raha toa ka navela hiasa am-pilaminana ny ben'ny tanàna. Efa ela no tsikaritra io fifandonana teo amin'ny mpitondra sy ny kaominina io, ary tsy nety niravona ny olana. Tsy ho gaga isika raha vahoaka maro be no tonga nihaino ny ben'ny tanàna ny sabotsy lasa teo, satria hetsika ho fanaporofoana iny, fa misy fitakiana ataon'ny ankamaroan'ny Malagasy eto. Ny endriky ny sakantsakana sy ny fanapenam-bava atao amin'ny sehatra maro no anton'iny” , hoy ramatoa Gisele Rabesahala.

Ilaina ny nametrahana iny kianjan'ny demokrasia iny, mba ahafahan'ny rehetra miteny sy maneho hevitra. Raha kobonina hono ny alahelo, dia miteraka zava-doza.

“Mbola hihenjana amin'ireny hetsi-bahoaka ireny ve ny fitondrana ?” , hoy ity mpanao politika ity. Aoka hipetraka ny fihainoana, fa tsy hanao be marenina. Tsapa fa mitombina avokoa ny fitakiana ataon'ny ben'ny tanàna Andry Rajoelina sy ireo vahoaka maro tonga teny Ambohijatovo. Ny fanatanterahana azy sisa andrasana.

Lalàna hifehy ny antoko politika

Momba ny fandaniana ny lalàna hifehy ny antoko politika eto amintsika kosa, dia tsy mankasitraka iny Rtoa Gisèle Rabesahala. Ny antony, dia tokony hanana zo hilatsaka ny Malagasy rehetra. Tsy tokony ho ferana ihany koa ny fanaovana kongresy, na folo taona na latsaky izay. Ny antony, dia manana ny fitsipika hitondrany azy ny antoko isan'isany, fa tsy ho ferana tsy maintsy hanao izany isaky ny telo taona. “Tsy ny antoko TIM izay vao niforona omaly” , hoy ihany ity mpikambana ao amin'ny Akfm ity, no ahafehy ny fanaovana politika eto Madagasikara” . Aminy dia tokony nisy ny fiarahana nidinika teo amin'ny lafin-kery samy hafa nentina namolavola izany sata hifehy ny antoko politika izany, fa tsy olona notsongaina toy ny hita teny Iavoloha farany teo.

Mitomany ny faritra

Naivo kely — 2009-01-22T03:20:04Z

Tonga ny rivo-doza, ary manomboka manimba zavatra maro amin'ny toerana izay lalovany, ka mampitondra takaitra ny vahoaka maro. Potika ny trano sy ny tetezana tany amin'ny faritry Menabe, ary toy izany ny any Sava. Manomboka misy ny tra-boina, ary mandray ny andraikiny ny eo anivon'ny BNGRC.

Miakatra ny rano, ary manomboka hita ny fahapotehan'ny voly isan-karazany. Tsy mbola misy ny aina nafoy, izay isaorana ilay nahary, fa ny biby fiompy kosa no voalaza fa nisy lasan'ny rano. Na eo aza izany, dia tsy kivy tsy ketraka ny mponina fa mitraka hatrany. Manomboka aparitaka any amin'ireo olona efa tra-boina ankehitriny ny fanampiana avy amin'ny fitondram-panjakana, toy ny sakafo sy ny fanafody. Andro maromaro mialohan'izao fahatongavan'izao rivo-doza izao no efa niomana mialoha ny sehatra iray miahy amin'ny loza voajanahary toy izao. Efa maro ny trano lay naparitaka eran'ny faritra, ho fiomanana mialohan'ny loza.

Mifantoka any amin'ity rivo-doza ity avokoa ny mason'ny rehetra. Rariny izany, satria loza mihatra amin'ny firenena. Tsy apetraka ho andraikitry ny fanjakana samy irery anefa ny fisorohana ny loza fa manana andraikitra goavana lehibe amin'io ny isam-batan'olona. Ny haino aman-jery isan-karazany. Aoka mba omena sehatra amin'ny fampahalalàna vaovao ny vahoaka, fa tsy dia ny resaka politika izay manimba hatrany no omena sehatra isan'andro. Izay ilay andraikitra fanabeazana sy fitaizana eo amin'ny fahampahalalam-baovao isan-karazany. Mitomany tanteraka ny faritra maro noho iny rivo-doza iny, izay tsy ho vita ao anatin'ny fotoana fohy ny fanarenana ny simba.

Midika izany, fa ho sasatry ny manarina hatrany isika isan-taona izao. Antenaina fa tsy hanampy trotraka ny fahasimbana ny “rivo-doza politika” izay toa miha-mahazo vahana eto amin'ny firenena. Zava-droa loha samy hafa nefa sahala ireo. Samy manimba ny toe-karena avokoa ireo, ka samia mitandrina, fa ny nitranga teo aloha aza efa nanenenana.

Tsy mpiasan'ny TGV ny fanjakana

Naivo kely — 2009-01-21T03:42:43Z

Tonga ny ora nangatahan'ny mpitarika ny TGV teny Ambohijatovo, amin'ny tokony hametraham-pialan'ny minisitra roa ao anaty governemanta. “Tsy hiala izahay” , hoy iretsy farany, ary isan'ny nanambara io ny minisitry ny Vola, Hajaniriana Razafinjatovo.

Aorian'ny tsy fahombiazan'ny fitakian'i Andry Rajoelina miaraka amin'ireo mpanara-dia azy, dia hisy ny fepetra ho raisin'ireto farany, saingy mbola tsy fantatra izay ho ataon'izy ireo amin'izany. Mbola fitakiana hilaina valiny hatramin'ny sabotsy izao ihany koa ny fanokafana ny fahitalavitra VIVA, nefa iny niarahana nahita iny ny fandraofan'ny fanjakana ny fitaovana mampiodina ity fahitalavitra ity teny Ambohimitsimbina ny alahady lasa teo. Ny radio VIVA aza nahazo fampitandremana indray ny alatsinainy lasa teo, satria hambara ho mitarika ny olona hanao fanonganam-panjakana.

Raha ireo fitakiana ireo ny atao indray mitopy maso, dia tsy mpiasan'ny TGV ny fanjakana, ka hanaiky izay baiko hampanaovina azy. Manana ny fiandrianany ny fanjakana, ary efa nohamafisin'ny fanjakana hatrany, fa tsy ben'ny tanàna iray no andeha hibaiko fanjakana, ary tsy misy fanjakana kely aoriny anaty fanjakana eto.

Tapaka ny tady

Ho sarotra ny raharaha, satria mahatsapa ny mety ho tohin'izao ny rehetra. Ny ben'ny tanàna izay nahazo hery tamin'ny fahatongavan'ny vahoaka maro tetsy Ambohijatovo ny sabotsy teo, dia tsy hihemotra amin'ireo fitakiana efa naloaky ny vavany. Ny fanjakana ankilany, dia mahatsapa ho osa raha toa ka manaiky lembenan'ny ben'ny tanàna an-drenivohitra iray. Hiroso amin'ny fitarihana olona hanao fahirano ny minisitera ve ny ben'ny tanàna sa hijanona eo amin'ny fitakiana tsotra fotsiny ? Manoloana io, dia tsy handefitra eo anoloan'ny hambara ho fanakorontanana miseho ny fanjakana, ka hampihatra ny lalàna mifanaraka amin'ny tranga miseho.

Mijanona amin'ny fanambarana

Rehefa niantefan'ny fantsy maro avy amin'ny ankolafin'olona maro samy hafa kosa ny mpanao politika ho “mpijapy train” , dia nijanona amin'ny resaka fanambarana hatreto. “Manohana ny fanajana ny demokrasia izahay” , hoy ny fanambarana voaray etsy sy eroa. Tsy misy ihany koa ny fiaraha-midinika matotra iarahany amin'ny ben'ny tanàna amin'izay tohin'ny fitakiana, fa ny hetsika amin'ny sabotsy no nalefa any amin'izy ireo. “Mpanimba tolona ny mpanao politika, satria efa naloam-bahoaka, ka aleonay miandry izay tohiny” , hoy ny iray tamin'izy ireo. Voakitika ny hambom-ponay amin'io teny io, ka mitazana aloha hatreto izahay hambara ho goaika antitra” .

Aiza ny FFKM ?

Eo aloan'ity raharaha ity, dia miantefa any amin'ireo raiamandreny ara-panahy ny sain'ny rehetra. Ireo FFKM io, satria ireo no antenaina ho elanelam-panahy ahafahana misoroka ny mety hisian'ny ady an-trano eto. Tsy mbola heno anefa aloha ny tena fidirany an-tsehatra amin'izao raharaha izao, fa ny fitarihana fotoam-pivavahana sy ny fihaonana amin'ny andrim-panjakana samy hafa no heno. Tsy misy olona iray tsy maniry ny hidiran'ity seham-pinoana mitambatra ity eo amin'izay raharaham-pirenena eto ity. Mbola azo atao tsara ny miroso amin'ny fifandaminana, saingy hisy hametraka ny hambom-po ho ambonin'ny tombotsoam-pirenena ve eto ? Indrindra taorian'ireny vava be natao tetsy sy teroa ireny ? Samia tonga saina, fa ny manarina ny rava tsy vita ao anatin'ny taona vitsy, fa ny mandrava no vita ao anatin'ny minitra.

Mandehandeha mahita raha

Naivo kely — 2009-01-21T03:39:43Z

Manomboka ny asa etsy Befelatanana. Nisento avokoa ny rehetra, tamin'ny fanapahan-kevitra noraisin'ny fanjakana momba ny fanamboarana azy ity. Niara-niaky ny rehetra, fa tsy tao anatin'ny tetikasan'ny minisiteran'ny Fahasalamana ny hanamboatra azy io, saingy rehefa nidina tampoka teny ny filoha Ravalomanana, dia niroso tamin'ny baiko hentitra ny hanamboarana izany hopitaly manana ny lazany izany.

Tsy ao anatin'ny tetibolan'ny minisitera taona 2009 ny fisian'ny fanamboarana azy. Eny na dia miakatra andro aman'alina aza ny teti-bola natokan'ny fanjakana ho entin'ny minisitera miasa. Vola avy any amin'ny filoham-pirenena mitentina Ar 200 tapitrisa aloha hatreto no entina hanarenana ny simba. « Izay marary andrianina », hoy ny fomba fiteny Malagasy izay. Mbola mitoetra ve io ankehitriny ? Tsia no valiny, satria izay tsy manam-bola dia eo no raisina. Misy ny ezaka izay apetraka eny anivon'ireny minisitera ireny, saingy moa mba azontsika an-tsaina no mitranga any amin'ny toeram-pitsaboana lavitra andriana rehetra any ? Ny eto an-dRenivohitra aza fahapotehana no hita. Miaiky ny rehetra fa marina ilay tenin'ny filohan'ny Nosy, ny tsy tokony hijanonan'ny tompon'andraikim-panjakana ao anaty birao lava. « Ny mandehandeha mahita raha », hoy ny fomba fiteny, koa antenaina fa raha misy ny fitsidihana matetika ataon'ireo manam-pahefana isan-karazany, dia hivaha avokoa ny olana mianjady amin'ny mponina maro isaky ny faritra. Sa tsy sahy mandray andraikitra mivantana ireny olona nomena fahefana ireny, raha tsy eo ny filoha ?

Mihorohoro ny mpiasa

Naivo kely — 2009-01-21T03:39:39Z

Mafàna manaraka ny raharaham-pirenena ny fandrahonana haino aman-jery eto amintsika. Iny niarahana nandre iny fampitandremana nataon'ny fanjakana ny radio Viva, izay voalaza fa mitarika ny olona hanongam-panjakana. Teo ihany koa ny fandrenesana ny fanakatonana ny radio “Ravinala” any Manakara omaly.

Taorian'ireo, dia mihoroho ny mpiasan'ny haino aman-jery samy hafa. Mikasika ny vaovao avoakan'ireny haino aman-jery samy hafa ireny, izay mety tsy ahafa-po na ny andaniny na ny mpomba ny ankilany. Ekena fa mety samy hanana ny firehany ny mpanao gazety samy hafa, nefa aoka tsy ho entina hampitahorana ny haino aman-jery samy hafa ny toy izao. Izay heverina fa mandika ny lalàna velona mifehy ity asa ity kosa, dia hafa izay.

Hiverina tsy ho ela ireo nitsao-ponenana

Naivo kely — 2009-01-20T03:40:16Z

Andro sisa isaina, dia vonona ny hitodi-doha eto an-tanindrazana ireo nitsoam-ponenana any ivelany. Ireo voakasiky ny raharaha 2002, ireo mikasa hody eto Madagasikara ireo.

Ao anatin'ny hetsim-panoherana eto an-dRenivohitra izay tarihan'ny ben'ny tanàna, Andry Rajoelina, no anton'ity fiverenana ity. Andro maro lasa izay no efa nitsirian'izay fikasana hody eto Madagsikara izay, saingy mbola tao ny tahotry ny hisian'ny fisamborana ataon'ny mpitondra ankehitriny raha vao migadona etsy Ivato.

Taorian'ny dian'ny ben'ny tanàna, Andry Rajoelina tany ivelany farany teo, dia voalaza fa nisy ny dinika tamin'ny sasany tamin'izy ireo. Fahombiazana no azo tamin'ny famoriam-bahoaka voalohany tetsy Ambohijatovo ny sabotsy lasa teo, ary nanakoako tany ivelany izay famoriam-bahoaka izay.

Mpanankanto iray fata-daza eo amin'ny vazo miteny, ary isan'ny nametraka ity fitondrana ity tamin'ny toerany, saingy lasa any ivelany no nahazoana io vaovao io.

Ny amiraly Ratsiraka izay voalaza fa ao anatin'ny tanjany tanteraka amin'izao fotoana no maniry hitodi-doha eto amintsika. Efa ela ihany koa no nisian'io fikasana io, saingy mbola tsy tanteraka. Miandry ny famoriam-bahoaka manaraka etsy Ambohijatovo, sy ny mety ho fivoaran'ny tolona no ahatongavan'izy ireo eto amin'ny tanàna. Voalazan'ity vaovao ity ihany koa anefa, fa misy ireo tsy te-hiverina intsony eto, satria mandeha ny bizina any ivelany, ary ao no mbola mianatra sy efa miasa any. Ireo manam-pikasana ny hiditra amin'ny raharaha politika no tena maniry mafy ny hiverina eto an-tanindrazana. Rahampitso alarobia, dia voalaza fa hisy fivoriana ataon'ireo Malagasy monina ao Paris ireto. Misy fanampiana ataon'ireo malala-tanana ho an'ireo Gasy ireo ihany koa amin'ny hetsika izay ataony rehetra any ivelany.

Andro maro tokoa izay no nanaovan'ireto Malagasy ireto hetsika manoloana ny masoivohontsika ao Paris. Niezaka nanontany ny fianakavian'ireo manana havana nitsoaka any ivelany izahay, ary voaporofo, fa arakaraky ny tanjaky ny tolona eto an-dRenivohitra, eny manerana ny faritra samy hafa no antoka amin'ny fiverenan'izy ireo.

Ny alahady teo no nandrenesana fivoriana tamin'ny fianakavian'ireto Malagasy any ivelany ireto natao teto an-dRenivohitra tokony ho tamin'ny 5 ora ariva. Ny fanentanana olona maro hitsena azy ireo eny Ivato no vontoatin'io fivoriana io, rehefa tonga ilay fotoana. Raha tsy mahomby kosa anefa ny hetsika rehetra eto izay tarihan'i Andry Rajoelina, dia hanohy ny fiainany any La-Frantsa ihany izy ireo.

Very ny hasina maha-malagasy

Naivo kely — 2009-01-20T03:37:32Z

Manimba zavatra ny politika. Tafiditra lalina amin'io anefa isika eto an-dRenivohitra, ary mifampiahiahy avokoa ny mpiara-belona rehetra. Fomban-javatra io, satria na ny mpivady aza tsy miray fandriana rehefa samy manana ny firehana arahiny ny andaniny sy ny ankilany.

Ny tena mampalahelo tao anatin'izay andro vitsivitsy izay, dia ny fahaverezan'ny soa toavina maha-malagasy sahady eo amin'ny ankolafin'olona sasany. Voaivaiva ny raiamandrenin'ny firenena, dia ny filoha Ravalomanana izany. Nahetrin'ny sasany ambany ny haja sy voninahitry ny firenena. Endrika iray, izay hilazana ny tsy fisian'ny fahamatoran'ny toe-tsaina ny toy izany. Tsarovy, fa na inona tsy fitoviam-pijery politika eto, dia mbola Ravalomanana ny filoham-pirenena, ary raiamandrenin'ny Malagasy rehetra. Tsy ho diso isika raha mametraka hatrany ny haja ho an'izany raiamandreny izany.

Toy izany koa ny mpomba ny ankilany. Izany ben'ny tanàna eto an-dRenivohitra izany, dia manana anjara lehibe hitondra ny tanàna sy ny fiainam-bahoaka ao aminy. Manana ny fomba fijery manokana izay tsy hitoviany amin'ny mpitondra izy. Tsy izay no entina hanambaniana ity ben'ny tanàna ity eo amin'ny lafiny maro. Ny hevitra no tsy mitovy, fa ny ra maha-malagasy ao amintsika rehetra. Nahoana no vingavingain'ny hafa ihany koa ity ben'ny tanàna ity ? Omeo ny haja amam-boninahiny ireo olona roa tsy mitovy fomba fijery ireo. Zaran'ny hafa aza isika hifanebaka am-pitoerana eto, ka hiafara amain'ny ady an-trano, mba ahamora ny hanjanahana antsika amin'ny lafiny maro. Dia ho sanatria ve hitovy amin'ireo tany atsy Afrika hanjakan'ny vono olona sy ny ady an-trano ny eto an-dRenivohitra, izay efa mitady ahazo vahana any amin'ny faritra samy hafa ? Miankina amintsika mianakavy ny hipetrahan'ny fampanjakana ny fifanajana, na dia ao aza ny fomba fijery samy manana ny azy. Aleo haka anjorom-bala ny tendrom-po tsy mba namana sao hanenenana atsy ho atsy.

« Miandry Top, dia … »

Naivo kely — 2009-01-20T03:37:23Z

« Na dia mbola any an-dRenivohitra ihany aza no misy ny fikambanana TGV, dia efa vonona ny anay eto Antsirabe ». Io no nambaran'i Haja Elima, satria efa saika niditra ho isan'ny TGV avokoa ny mpikatroka amin'ny antoko sy fikambanana maro ao amin'ity faritra ity.

Tsy mbola nisy aloha hatramin'izao filazan'ny filoha mpanorina ny fikambanana ny hanaparitahana ny TGV any amin'ny faritra, saingy efa mangetaheta izany ny maro. Misy ny fivoriana matetika ao an-drenivohitry Vakinankaratra ao, ary mifantoka tanteraka amin'ny hetika eto Antananarivo ny mason'izy ireo. Voalaza fa misy ihany koa ny hetsika sosialy maro samy hafa efa natao, mba hanampiana ny tanora, nataon'ingahy Haja Elima, mba ho fanampiana azy ireny. Ity mpanetsiketsika ny TGV ao Antsirabe ity, dia tsy zoviana amin'ny maro, satria nanana andraikitra lehibe tamin'ny sehatry ny fifidianana tao Vakinankaratra. « Miandry Top izahay dia… », hoy ingahy Haja.

Aparitaka manerana ny faritra

Naivo kely — 2009-01-20T03:37:16Z

Mihazakazaka ny toe-draharaham-pirenena. Toy izany koa ny fametrahana ny FCD (Force pour le développement de la démocratie) tarihan'ingahy Alain Ramaroson any amin'ny faritra samy hafa eto Madagasikara.

“Mihetsika izahay manao io asa io” , hoy ingahy Jaques Aimé mpikatroka ao amin'ity fikambanana ity.

Ho fanajana sy fitakiana ny hampiharana ny tena demokrasia eto Madagsikara no anton'izany, hoy izy ireo. Làlana iray ahafahana mifampitaiza ny voarakitra ao anatin'ilay sata novolavolain'ireto mpikambana ireto, ary hanentanany ny maro, mba hanao sonia izay voarakitra ao. Ny ambaratongam-pahefana maro samy hafa no nandefasana azy azy io, ary alefa any amin'ireo masoivoho eto amintsika. Alefa any Londres kosa rehefa vita izany rehetra izany, mba ahafantaran'izao tontolo izao ny endrin-java-misy eto Madagasikara.

Miomana ny handray fanjakana i Andry Rajoelina

Naivo kely — 2009-01-19T02:52:01Z

“Ampy izay ny jadona, mitrakà ry vahoaka Malagasy, fa tonga ny fotoana hialantsika ao anatin'ny fampihorohoroana” . Io no teny nentin'ny ben'ny tanàna eto an-dRenivohitra, Andry Rajoelina, nanokatra ny arahaba tamin'ny vahoaka tonga teny Ambohijatovo ny sabotsy maraina teo.
“Vahoaka mitraka miala ao anatin'ny fanangejana no eto manomboka izao. Izay no antony nametrahana ity “Kianjan'ny demokrasia ity, mba ahafahan'ny rehetra maneho hevitra” . Hoy ihany izy. Nipetraka nandritra io sabotsy io indray, ny fepetra napetraky ity ben'ny tanàna ity izay tsy maintsy hamalian'ny fanjakana ny fitakiana vaovao. Isan'io ny tsy maintsy hialan'ny minisitry ny Vola sy ny Tetibolam-panjakana, ary ny minisitry ny Fanajariana ny tany hatramin'ny alarobia izao. Takiany ny hamoahan'ny haino aman-jerim-panjakana ny vaovaon'ny mpanohitra. Raha toa ka tsy misy izany, dia ingahy ben'ny tanàna sy ny vahoaka no hitaky ny izany. “Mila sokafana hatramin'ny sabotsy izao ny fahitalavitra VIVA sy ny haino aman-jery rehetra nakaton'ny fanjakana hatramin'izay. Ho alaina ihany koa ny tany misy ny fahitalavitra MBS etsy Anosipatrana. Dila ireo fem-potoana ireo, dia handray ny andraikiny ny vahoaka” , hoy ihany ity ben'ny tanàna eto an-dRenivohitra ity.

Amidy ny “Force One”

“Fandaniam-bolam-panjakana tsy amin'ny antony no nividianana ny “Force One” . Tsy nandalo tolo-barotra ny fividianana azy. Misy volan'ny filoham-pirenena tafiditra ao anatin'io, izay midika fa ampifangaroany ny raharaham-panjakana sy ny azy manokana. Noho izany, tsy maintsy amidy ny Force One” , hoy i Andry TGV, ary averina any amin'ny vahoaka ny vidiny. Tsy azo ekena ny famarotana ny tany amin'ny vahiny, ary aoka izay ny am-pihi-mamba ny fananam-bahoaka” .

Ireo fitakiana rehetra ireo, dia efa midika amin'ny maro, fa tsy hanaiky lembenana intsony ity ben'ny tanàna ity, ary miomana ny handray fahefana ny tenany. “Ny vahoaka no tokiko” , hoy ihany ingahy Andry Rajoelina. Hitohy amin'ny sabotsy ny hetsika rehetra, ary amin'io ihany koa ny hiandrasana ny valin'ireo fitakiana rehetra ireo.

Vory lanona ny mpanao politika

Nifanotrona tamin'ity ben'ny tanàna ity ireo mpanao politika rehetra mivondrona ao amin'ny fanoherana. Isan'io ingahy Alain Ramaroson mitarika ny FCD, Ny ben'ny tanànan'i Toamasina teo aloha, Roland Ratsiraka, ny vadin'ny ben'ny tanànan'i Fianarantsoa teo aloha, Ialy Rakotoniaina, ingahy Ranjivason, ny antoko AVI, Akfm, Rpsd Vaovao, ny CRN, ingahy Henri Lecacheur, ny Matsilo, ny Tambatra, AME, sy Ramakavelo ary ny mpikambana ao anatin'ny fiadidiana ny tanànan'Antananarivo.

Fahavalon'ny mpanohitra

Naivo kely — 2009-01-19T02:49:08Z

Ho avy izahay hiaraka amin'ny vahoaka, raha afenina ao amin'ny TVM ny marina momba ny hetsi-bahoaka. Teny heno tetsy Ambohijatovo io ny sabotsy teo.

Raha nijery fahitalavitra tokoa ny maro ny alin'io, dia tsy nandeha ity hambara ho fitokanana ny “Kianjan'ny demokrasia” teny Ambohijatovo ity. Midika avy hatrany izany, fa handray ny andraikiny ny mpanohitra. Mety hisy ato ho ato, fakana ankeriny io haino aman-jerim-panjakana io izay ho ataon'ny mpanohitra. Endrika efa fahita hatramin'ny nisian'ny fanoherana teto amintsika ny fakana an-keriny haino aman-jerim-panjakana toy izao. Tamin'ny andron'ny revolisiona, dia efa niakatra tao i Jaona, ary izy irery no tratra farany tao. Efa nanao izany ry Joma Ernest sy ry Liva Ramahazomanana ny taona 89. Nidina teny ihany koa ry Alain Ramaroson sy Pierre Tsiranana ny taona 2002 raha nafana ny hetsika teto an-dRenivohitra, ary dia io manangasangasa io indray izany ankehitriny.

Tafiditra ao anatin'ny haino aman-jery ho fahavalon'ny mpanohitra ihany koa ny MBS. Ny antony, dia an'ny filoha Ravalomanana ity haino aman-jery ity, ary mbola tanin'ny kaominina no ampiasainy. Ireny niarahan'ny maro nandre teny teny Ambohijatovo ireny ny tatitra momba io tany io, izay nataon'ny ben'ny tanàna.

Raha ireo tranga ireo no atao indray mitopy maso, dia hiaran'ny valifaty politika indray ny haino aman-jery eto manomboka izao. Nakaton'ny fanjakana ny VIVA, dia ho alain'ny mpanohitra ihany koa ny tany misy ny MBS. Rehefa tsy nahazo sehatra nandritra ny fotoana maro tao amin'ny TVM ny mpanohitra, dia ho ankeriny no hanaovana izany. Ahoana ny hevitry ny Holafitry ny mpanao gazety amin'izany, indrindra fa ireto fikambanan'ny mpanao gazety maniry ohatry ny anana etsy sy eroa ireto ? Voa io ny VIVA, dia miray hina avokoa ny ankamaroan'ny mpanao gazety, miaro azy. Ary raha voa ireto farany mba ahoana ? Sa zara aza voa ny TVM sy ny MBS ?

Mazava ny resaka

Naivo kely — 2009-01-19T02:49:01Z

“Mitady ny fomba rehetra handrombahana fahefana ny ben'ny tanàna eto an-dRenivohitra Andry TGV. Mipoitra avokoa ankehitriny ny tetiny hanaovana izany, ka ny fametrahana kianjan'ny demokrasia no lalana iray heveriny fa hidirana amin'io fandrombaham-pahefana io. Tsy misy afa-tsy ny fifandimbiasan-toerana amin'ny alàlan'ny fifidianana ihany anefa raha te-hampanjaka izany demokrasia izany” . Io no nambaran'ny filohan'ny antenimieran-doholona, Randriasandratriniony, manoloana ny hetsika politika mitranga eto. Tsapa, ary mazava ny resaka fa ingahy Andry Rajoelina no filohan'ny mpanohitra eto.

Fanehoan-kevitra izay mametraka sy mampahatsiahy ho an'ny vahoaka eto Iarivo, fa tsy vanim-potona ny fanakorontanana intsony izao. Efa nilaozan'ny toe-trandro ny fidinana an-dalam-be sy ny fikomiana. Mbola io anefa no làlan'ny ben'ny tanàna sy ny mpanohitra, ka ho aiza no hiafaran'ny toe-karena sy ny tena safidim-bahoaka raha korontana lava izao no apetraka eto amin'ny firenena ?

Handray ny andraikiny ny fanjakana

Naivo kely — 2009-01-19T02:48:57Z

Inona no hitranga ? Samy maminavina ny mety ho tohiny isika, satria tsy fitakiana fe fitakiana no ataon'ny mpanohitra, fa efa fanonganam-panjakana. Ny antony dia ireo fitakiana maro tsy maintsy ho tanterahin'ny fanjakana amin'ity herinandro ity.

Ny fanjakana efa nampitandrina ireo minia manakorontana, indrindra ireo mianan-kendry amin'ny fanonganam-panjakana isan-karazany. Nipoitra iny ny hevitry ny ben'ny tanàna, ary heno fa handray ny andraikiny tandrify azy ny fanjakana. Tsy hiteny izahay hoe fisamborana, fa ny fitandroana ny tsy hiverenan'ny toy ny tamin'ny taona 2002 ireny no ataony. Hisy filan-kevitry ny minisitra amin'izao fiandohan'ny herinandro izao, izay hivoaka ao ny fepetra apetraka hisoroana ny korontana eto. Ny filoha Ravalomanana ihany koa efa nampitandrina ombieny, amin'izay miniha mioam-pefy.

Miara-miaky ny rehetra, fa tsy nisy korontana ny sabotsy teo, nefa ny trambo mandady eny foana. Mbola hisy fifampidinihana ho vita ihany ve eto manoloana izao afo efa midodaka izao ? Tamin'ny ora farany, omaly dia re fa nalaina teny Ambohimitsimbina ny “émetteur TV” an'i VIVA, ary niantso ny andrimasom-pokonolona i Andry Rajoelina hiaro ny “station VIVA” etsy Ankorondrano.

Takon'ny aloka

Naivo kely — 2009-01-17T02:27:31Z

Tia raha isika eto Madagasikara, ary tsy mety fay amin'izay tranga efa nampidi-doza ny firenena. Hifantoka etsy Ambohijatovo ny mason'ny mpanara-baovao maro. Na dia ambara aza fa leo politika ny olona, dia tsy azo hodian-tsy hita ny fifantohan'ny saina amin'izay mety ho tohin'ny tolona ataon'ny mpanohitra.

Ny mampalahelo, dia variana amin'ny resaka toy izao ny ankamaroan'ny maro, ka ny lahasa entina hanatsara ny fianam-bahoaka andavan'andro no adino. Ny mpitantana ny kaominina, dia hifantoka amin'ny fitakiana ataony manomboka izao etsy Ambohijatovo. Ny fanjakana foibe kosa, dia mety ho variana hamono ny afo arehitry ny sasany. Ny vahoaka kosa etsy ankilany very fanahy toy ny valala voatango. Ekena fa misy tompon'andraikitra isan-karazany mampandeha ny masinina adiministrativa, saingy toa takon'ny aloka ireny asa ireny, raha tsy hiteny afa-tsy ny fanamboarana ny hopitaliben'i Befelatanana, ny fijinjana ny vary aloha, sy ny fanadiovana ireo lakan-drano isan-karazany eto an-dRenivohitra. Misy ny faly amin'ity hetsika manomboka anio eny Ambohijatovo ity, ary tsy vitsy koa ny tsy faly, satria manelingelina ny fihariany.
Ny ho avin'i Madagasikara, manao ahoana ? Mianakina aminao ny valiny.

Manamaloka ny risim-pon'ny vahoaka

Naivo kely — 2009-01-17T02:27:21Z

Rehefa tsy naha-taitra ny maro ny fanehoan-kevitra politika hatramin'izay, dia ny gadra indray no nanao ny nataony. Teo no naha-rarakivy ny ambanilanitra, satria ireo nahavanon-doza teo amin'ny mpiara-belona no tafavoaka ny fonja nitazomana azy.

Samy mailo ny ankamaroan'ny mponina amin'ny asa andavan'andro izay ataony. Ity fikasan'ny hafa hamerina ny lasa amin'ny alàlan'ny fihetseham-bahoaka ity, dia efa zava-doza ho an'ireo mitady harapaka isan'andro. Asa inona tokoa no ho vita ao anatin'ny korontana lava reny toy ny nitranga tamin'ny 2002 ireny. Mitaona ny olona hidina andàlam-be ny ben'ny tanàna sy ny mpanohitra. Kivy ny rehetra, ary vao maika manampy trotraka io ny fandrenesana ny fonja vaky saika isan-kerinandro ity. Manamaloka ny risim-pon'ny vahoaka hanao ny fihariany isan'andro ny toy izao. “Soa aloha fa mbola vao fitokanana ilay “kianjan'ny demokrasia” ny anio, hoy ity renim-pianakaviana mpivarotra vary mitsangana etsy amin'ny "zay maika". “Akatonay ny tsena raha manomboka ny fitaomanana vahoaka” , hoy ihany izy, satria iza no andeha hamono antoka amin'izay korontana politika any” ?

Dia miandry ny mety ho avoakan'ny anio sy ny ampitso ny rehetra, ary manantena mba tsy hisy fanelingelenana ny asa ataon'ny hafa ny fitakiana izay hiainga etsy Ambohijatovo.

Hifandroritana ny anarana

Naivo kely — 2009-01-17T02:27:17Z

Toerana tsara, sady talaky maso ny kianja etsy Ambohijatovo. Tsy atao mahataitra raha ifandrombahan'ny olona ho atao sehatra ifanankalozan-kevitra.
Ireto ireo anarana efa napetraka ho anaran'ity kianja ity. Natao ho “Kianjan'i Laha Gaston” izy io ny taona 1992, rehefa avy nifampitifitra tamin'ny mpitandro ny filaminana teny Soanierana ny federalista. Maty tamin'io ingahy Laha Gaston, ary notakian'ireo mpitolona tamin'izany ny ametrahana ny anarany. Ny mpitantanana ny kaominina teto kosa, dia nametraka ny anarana tamin'izany ho “Kianjan'ny ankizy” . Io no anarana nandritra ny fotoana maro, satria hatramin'izao dia mbola maro no miantso izany. Dia hivadika ho “Kianjan'ny demokrasia” indray izany manomboka androany ity kianjan'Ambohijatovo ity. Toerana iray fanehoan-kevitra araky ny nambaran'ireo hitokana azy anio. Asa inona indray no hiantsoana azy atsy ho atsy, fa tsapa aloha dia hifandrotehan'ny maro ny anarana omena ity kianja ity. Toerana alokalofan'ny hazo sy bozaka maintso. Toerana fakana aina ho an'ireo tsy afaka mody atoandro. Ho lasa hilalaovan'ny mpanao politika izy io manomboka izao.